קונטרס פוקח עורים/הקדמה
| קונטרס פוקח עורים |
|---|
| הקדמה • חלק ראשון • חלק שני |
| תרגום וביאור מהרה"ח שמואל דובער מבוריסוב (מתוך חוברות "התמים") |
| חלק א • חלק ב |
הקדמה
כבר שוין לאנג האבן געשריבן אלע ספרי מוסר עס איז ניט גענוג פאר איין מענש אז ער אליין [איז] גוט און רעכטפארטיג, אלא ער ברויכט צו זעהן אנדערע לייט גם כן צו גאטס דינסט צו לערנען. אזוי ווי דוד המלך ע"ה האט זיך בארימט אלמדה פושעים דרכ[י]ך איך לערן די מערדער וואס האבן מורד געווען אן השי"ת זיין וועג וחטאים אליך ישובו און וואס זינדיגן אומגערן זיי לערן איך ווידער קערן זיך צוטאן השי"ת זיין ווילן. רק נאר פאר לומדים וואס קענען לשון קדש בין איך ניט געקומען צו שטראפן ווארום עס איז מצוי פיל ספרי מוסר אויף לשון הקדש, אבער פאר די מענטשען וואס קענען ניט לשון קדש, אויך נאך זוכן נאך ספרי מוסר וואס זיינען געשריבן אויף טייטש איז איין טרחא, דרום בלייבן זיי אן איין עצה ווי זיי זאלן טאן תשובה, דרום האט מיך מיין הארץ מזרז געווען צו שרייבן די וועגן פון תשובה אויף טייטש אז אלע זאלן זיך דערוועקן צו טאן תשובה פון די עבירות וואס מענטשן טוען זיי תמיד, אזוי ווי השי"ת האט געבעטן ישעי' הנביא ע"ה וכתוב בחרט אנוש שרייב מיטן פען פאר אלע מענטשן אז אלע זאלן פארשטיין דיין מוסר, און אגב איז דאס איין פעולה אפילו פאר דעם למדן ווייל עס איז געזאגט אויף מוטער שפראך דרום דערוועקט זיך די הארץ פון מענטשן צו מקיים זיין וואס ער זעט, למשל דער דאקטאר שרייבט ניט אין דאקטאר בוך פאר די דאקטוירים נאר צו פראסטע לייט, אף על פי כן אז איין דאקטאר לערנט דאס בוך קליגט ער זיך דורך דעם בוך אזוי ווי שלמה המלך ע"ה האט געזאגט תן לחכם ויחכם עוד דערצייל דיינע רייד פאר איין קלוגן איז איין פעולה דורך דעם וועט ער זיך מער קליגן, על כן למע"ה דער מענטש וואס איז איין טרוד זאל ער לערנען דעם ספר צוויי דריי מאל גלויב איך אז עס וועט אים א גרויסע טובה דערפון קומען, אז ער וועט זיך דערמאנען אן אלע שלעכטע מדות וואס זיינען געפונען ביי מענטשן פון יונגע יארן און וועט געפינען איין עצה טובה ווי אפצושיידן זיך פון די מדות רעות, ומכל שכן די געמיינע לייט דארפן דעם ספר אימער צו לערנען אזוי איז מיין האפנונג צו השי"ת אז ער וועט פון דעם ספר חוזר בתשובה זיין, און בזכות תשובה וועט קומען משיח צדקינו במהרה בימינו אמן.