תהלים פרק ו
א: לַמְנַצֵּחַ בִּנְגִינוֹת, עַל הַשְּׁמִינִית; מִזְמוֹר לְדָוִד.
ב: ה', אַל בְּאַפְּךָ תוֹכִיחֵנִי; וְאַל בַּחֲמָתְךָ תְיַסְּרֵנִי.
ג: חָנֵּנִי ה', כִּי אֻמְלַל אָנִי: רְפָאֵנִי ה' כִּי נִבְהֲלוּ עֲצָמָי.
ד: וְנַפְשִׁי, נִבְהֲלָה מְאֹד; ואת (וְאַתָּה) ה', עַד מָתָי.
ה: שׁוּבָה ה', חַלְּצָה נַפְשִׁי; הוֹשִׁיעֵנִי, לְמַעַן חַסְדֶּךָ.
ו: כִּי אֵין בַּמָּוֶת זִכְרֶךָ; בִּשְׁאוֹל, מִי יוֹדֶה לָּךְ.
ז: יָגַעְתִּי, בְּאַנְחָתִי אַשְׂחֶה בְכָל לַיְלָה, מִטָּתִי; בְּדִמְעָתִי, עַרְשִׂי אַמְסֶה.
ח: עָשְׁשָׁה מִכַּעַס עֵינִי; עָתְקָה, בְּכָל צוֹרְרָי.
ט: סוּרוּ מִמֶּנִּי, כָּל פֹּעֲלֵי אָוֶן: כִּי שָׁמַע ה', קוֹל בִּכְיִי.
י: שָׁמַע ה', תְּחִנָּתִי; ה', תְּפִלָּתִי יִקָּח.
יא: יֵבֹשׁוּ, וְיִבָּהֲלוּ מְאֹד כָּל אֹיְבָי; יָשֻׁבוּ, יֵבֹשׁוּ רָגַע.
