תהלים פרק ז'
א: שִׁגָּיוֹן, לְדָוִד:אֲשֶׁר שָׁר לַה' עַל דִּבְרֵי כוּשׁ, בֶּן יְמִינִי.
ב: ה' אֱלֹקָי, בְּךָ חָסִיתִי; הוֹשִׁיעֵנִי מִכָּל רֹדְפַי, וְהַצִּילֵנִי.
ג: פֶּן-יִטְרֹף כְּאַרְיֵה נַפְשִׁי; פֹּרֵק, וְאֵין מַצִּיל.
ד: ה' אֱלֹקַי, אִם עָשִׂיתִי זֹאת; אִם יֶשׁ עָוֶל בְּכַפָּי.
ה: אִם גָּמַלְתִּי, שׁוֹלְמִי רָע; וָאֲחַלְּצָה צוֹרְרִי רֵיקָם.
ו: יִרַדֹּף אוֹיֵב נַפְשִׁי, וְיַשֵּׂג וְיִרְמֹס לָאָרֶץ חַיָּי; וּכְבוֹדִי, לֶעָפָר יַשְׁכֵּן סֶלָה.
ז: קוּמָה ה', בְּאַפֶּךָ הִנָּשֵׂא, בְּעַבְרוֹת צוֹרְרָי; וְעוּרָה אֵלַי, מִשְׁפָּט צִוִּיתָ.
ח: וַעֲדַת לְאֻמִּים, תְּסוֹבְבֶךָּ; וְעָלֶיהָ, לַמָּרוֹם שׁוּבָה.
ט: ה', יָדִין עַמִּים: שָׁפְטֵנִי ה'; כְּצִדְקִי וּכְתֻמִּי עָלָי.
י: יִגְמָר נָא רַע, רְשָׁעִים וּתְכוֹנֵן צַדִּיק; וּבֹחֵן לִבּוֹת, וּכְלָיוֹת אֱלֹקִים צַדִּיק.
יא: מָגִנִּי עַל-אֱלֹקִים; מוֹשִׁיעַ, יִשְׁרֵי לֵב.
יב: אֱלֹקִים, שׁוֹפֵט צַדִּיק; וְקֵל, זֹעֵם בְּכָל יוֹם.
יג: אִם לֹא יָשׁוּב, חַרְבּוֹ יִלְטוֹשׁ; קַשְׁתּוֹ דָרַךְ, וַיְכוֹנְנֶהָ.
יד: וְלוֹ, הֵכִין כְּלֵי מָוֶת; חִצָּיו, לְדֹלְקִים יִפְעָל.
טו: הִנֵּה יְחַבֶּל-אָוֶן; וְהָרָה עָמָל, וְיָלַד שָׁקֶר.
טז: בּוֹר כָּרָה, וַיַּחְפְּרֵהוּ; וַיִּפֹּל, בְּשַׁחַת יִפְעָל.
יז: יָשׁוּב עֲמָלוֹ בְרֹאשׁוֹ; וְעַל קָדְקֳדוֹ, חֲמָסוֹ יֵרֵד.
יח: אוֹדֶה ה' כְּצִדְקוֹ; וַאֲזַמְּרָה, שֵׁם ה' עֶלְיוֹן.
