תהלים פרק ע
א: לַמְנַצֵּחַ לְדָוִד לְהַזְכִּיר.
ב: אֱ-לֹהִים לְהַצִּילֵנִי ה' לְעֶזְרָתִי חוּשָׁה.
ג: יֵבֹשׁוּ וְיַחְפְּרוּ מְבַקְשֵׁי נַפְשִׁי יִסֹּגוּ אָחוֹר וְיִכָּלְמוּ חֲפֵצֵי רָעָתִי.
ד: יָשׁוּבוּ עַל עֵקֶב בׇּשְׁתָּם הָאֹמְרִים הֶאָח הֶאָח.
ה: יָשִׂישׂוּ וְיִשְׂמְחוּ בְּךָ כׇּל מְבַקְשֶׁיךָ וְיֹאמְרוּ תָמִיד יִגְדַּל אֱ-לֹהִים אֹהֲבֵי יְשׁוּעָתֶךָ.
ו: וַאֲנִי עָנִי וְאֶבְיוֹן אֱ-לֹהִים חוּשָׁה לִּי עֶזְרִי וּמְפַלְטִי אַתָּה ה' אַל תְּאַחַר.
