ברכת ערב ראש השנה תשמ"א אחרי קריאת הפ"נ כללי - מוגה
דער אויבערשטער זאָל ממלא זיין משאלות לבב כל אחד ואחת פון די חתומים כאן און פון די וואָס זיי חתמ'נען בשמם, און פון די אַלע וואָס ווינטשן גוטע זאכן יעדער אידן און אלע אידן,
במילואם ובקרוב ממש,
ובמיוחד אין די ענינים וואָס זיינען דא אויסגערעכנט אין דעם פדיון (אין דעם צעטל).
ובפרט אַז דאָס ווערט אסיפת כולם יחד, וואָס דעמולט ווערט דאָך דאָס אַ נייע מציאות – האָט דאָס דעם תוקף און זכות הציבור[1], און נאכמערער – פון זכות הקהל.
ודבר בעתו מה טוב אז עס הויבט זיך אָן אַ שנת הקהל, "הקהל את העם האנשים והנשים והטף"[2].
און מ'זאל זוכה זיין בקרוב ממש צו מקיים זיין מצות הקהל בשנת תשמ"א (בשנת הקהל זו) בבית המקדש שיבנה במקומו[3], בגאולה האמיתית והשלימה ע"י משיח צדקנו.
און אויך ביז דעמולט – געבענטשט ווערן בבני חיי ומזוני רויחי, ובכולם רויחי.
ובכללות – א כתיבה וחתימה טובה לשנה טובה ומתוקה בטוב הנראה והנגלה למטה מעשרה טפחים,
און במהרה בימינו ממש.